विरेन्द्र बाग: माघ ३ , सञ्चारमन्त्री जगदीश खरेलले फागुन २१ गते हुने प्रतिनिधि सभा निर्वाचनमा आफू पनि उम्मेदवार बन्ने घोषणा गरेका छन्।
नेपाल पत्रकार महासंघको एसोसिएट प्रदेश समितिको दोस्रो सम्मेलनलाई सम्बोधन गर्दै उनले “चुनावपछि संसदमा पुगेर जनताको आवाज नीति र कानुनमा रुपान्तरण गर्ने चाहना” व्यक्त गरे। साथै, सरकारले तोकिएकै समयमा निष्पक्ष र पारदर्शी निर्वाचन गराउने प्रतिबद्धता पनि उनले दोहोर्याए।
भाद्र २३–२४ गतेको जेंजी आन्दोलनपछि शुसिला कार्की नेतृत्वको सरकारमा प्रवक्ता तथा सूचना तथा सञ्चार मन्त्रीको जिम्मेवारी सम्हालेका खरेल, सत्ता केन्द्रित राजनीतिभन्दा बढी संवाद, विवेक र स्पष्टताको प्रतीकका रूपमा चिनिन्छन्।
दुई दशकभन्दा बढी समय सञ्चार क्षेत्रमा सक्रिय खरेल, जनताका मुद्दालाई निर्भीकतापूर्वक उठाउने इमेज टिभीको लोकप्रिय कार्यक्रम “Hot Seat” का चर्चित प्रस्तोता हुन्। सत्तामा बसेकालाई असहज बनाउने, तर सत्यतर्फ उन्मुख गराउने गहन र चोटिलो प्रश्न सोध्ने पत्रकारको छवि नै उनको पहिचान बनेको छ।
राजनीतिमा प्रवेश गर्दा पनि उनले सत्ता होइन, सेवा लाई केन्द्रमा राखेका छन्। पत्रकारिताबाट आर्जित उत्तरदायित्व, पारदर्शिता र जवाफदेहिता संसदमा संस्थागत गर्ने दृढ संकल्प उनको राजनीतिक यात्राको आधार हो।
हाल चुनाव लड्ने मनसाय बनाइसकेका खरेलले कुन क्षेत्रबाट उम्मेदवारी दिने भन्ने विषय भने अझै टुंग्याएका छैनन्। तर, जहाँबाट लड्दा पनि सत्य बोल्ने, गलतसँग सम्झौता नगर्ने र जनताको पक्षमा अडिग रहने उनको चरित्र नबदलिनेमा समर्थकहरू विश्वस्त छन्।
कलमबाट सुरु भएको यात्रा अब संसदसम्म पुर्याउने तयारीमा रहेका जगदीश खरेल, आशा र भरोसाको नयाँ राजनीतिक अनुहारका रूपमा उदाइरहेका छन्।
