विरेन्द्र बाग : सरकारले गोरखापत्र संस्थानको महाप्रबन्धकमा पत्रकार हिक्मतबहादुर रावललाई नियुक्त गरेको छ। बिहीबार बसेको मन्त्रिपरिषद् बैठकले सूचना तथा सञ्चार मन्त्रालयको प्रस्तावमा रावललाई संस्थानको नेतृत्व दिने निर्णय गरेको हो। सरकारका प्रवक्तासमेत रहेका शिक्षामन्त्री सस्मित पोखरेलले उक्त निर्णय सार्वजनिक गरेका हुन्।
कैलालीका रावल नेपाली पत्रकारितामा दुई दशकभन्दा बढी समय सक्रिय रहेका पत्रकार हुन्। सुदूरपश्चिमका अनेक चर्चित समाचार राष्ट्रिय स्तरमा ल्याएका उनले एभिन्युज टेलिभिजनमा सुदूरपश्चिम ब्युरो प्रमुखका रूपमा आफ्नो परिचय स्थापित गरेका थिए। त्यसपछि उनी न्युज २४ टेलिभिजनमा आबद्ध भए, जहाँ उनले तत्कालीन चर्चित प्रस्तोता रवि लामिछानेसँग लामो समय एउटै संस्थामा काम गरे।
पछि रावल ग्यालेक्सी ४के टेलिभिजनमा पनि पुगे, जहाँ पुनः रवि लामिछानेसँगै सहकार्य गरे। ग्यालेक्सी छाडेपछि उनी बीबीसी नेपालीसँग आबद्ध थिए।
पत्रकारिताको मैदानबाट सरकारी सञ्चार संस्थाको नेतृत्वमा पुगेका रावलको नियुक्तिलाई सञ्चार क्षेत्रले चासोका साथ हेरेको छ। सार्वजनिक सेवा प्रसारण, सम्पादकीय विश्वसनीयता, डिजिटल रूपान्तरण र संस्थागत सुधारको चुनौती अब उनको काँधमा आएको छ।
सूचना तथा सञ्चार मन्त्रालयले यसअघि महाप्रबन्धक पदका लागि आवेदन दिएका उम्मेदवारमध्ये १० जनाको अल्पसूची सार्वजनिक गरेको थियो। उक्त सूचीमा हिक्मतबहादुर रावल, नारायणप्रसाद सापकोटा, भेषराज पाण्डे, राजन नेपाल, रामचन्द्र अर्याल, रुद्रबहादुर खड्का, लक्ष्मण कार्की, विश्वराज खनाल, शान्तराम विडारी र शिवकुमार भट्टराई रहेका थिए।
सबै प्रतिस्पर्धीलाई पछि पार्दै अन्ततः रावल गोरखापत्र संस्थानको महाप्रबन्धकमा नियुक्त भएका छन्। अब उनको कार्यकालले सरकारी सञ्चारमाध्यमको प्रभावकारिता, विश्वसनीयता र आधुनिकीकरणमा कस्तो परिवर्तन ल्याउँछ भन्ने विषय सबैको नजरमा रहनेछ।
