धनगढी — नागरिकता र जन्मदर्तासम्बन्धी आधारभूत जानकारी प्रदान गर्दै जिम्मेवार नागरिक बन्ने चेतना विकास गर्ने उद्देश्यले धनगढीस्थित Crescent City School (CCS) मा कक्षा ७ का विद्यार्थीहरूका लागि एकदिने सचेतनामूलक कार्यक्रम सम्पन्न भएको छ।
Citizenship Affected People’s Network (CAPN) को आयोजनामा सम्पन्न कार्यक्रममा कक्षा ७ का ७५ जना विद्यार्थी सहभागी थिए। कार्यक्रममा विद्यार्थीहरूलाई जन्मदर्ताको महत्व, प्रक्रिया, नागरिकता प्राप्तिको आधारभूत प्रक्रिया, कानुनी पहिचान तथा नागरिकका अधिकार र जिम्मेवारीबारे जानकारी प्रदान गरिएको थियो।
दिनभर सञ्चालन भएको कार्यक्रममा विषयवस्तुलाई विद्यार्थीहरूका लागि सहज र रोचक बनाउन विभिन्न खेल, प्रश्नोत्तर, अन्तरक्रिया तथा सहभागितामूलक गतिविधि सञ्चालन गरिएको थियो। यसबाट विद्यार्थीहरूले नागरिकता र जन्मदर्ताजस्ता महत्वपूर्ण विषयलाई व्यवहारिक रूपमा बुझ्ने अवसर प्राप्त गरेका थिए।
CAPN ले नागरिकताको अधिकार, कानुनी पहिचान तथा नागरिकतासम्बन्धी जनचेतना र पैरवीका क्षेत्रमा काम गर्दै आएको छ। यस्ता कार्यक्रममार्फत बालबालिका तथा समुदायमा जन्मदर्ता, नागरिकता र आफ्नो अधिकारप्रति सचेतना अभिवृद्धि गर्ने प्रयाससमेत गर्दै आएको छ।
विद्यालयका प्रधानाध्यापक अर्जुन नाथले विद्यार्थीहरूले आजको कार्यक्रममा प्राप्त गरेको ज्ञानलाई आफूमा मात्र सीमित नराखी परिवार तथा समुदायमा समेत बाँड्नुपर्ने बताउनुभयो। उहाँले यस्ता कार्यक्रमले विद्यार्थीहरूलाई अझ सचेत बनाउनुका साथै आफूले जानेका कुरा अरूलाई सिकाउने, सहयोग गर्ने र समाजप्रति जिम्मेवार बन्ने सहयोगी भावना तथा सकारात्मक सोचको विकासमा योगदान पुर्‍याउने धारणा व्यक्त गर्नुभयो।
कार्यक्रमले विद्यार्थीहरूलाई पाठ्यपुस्तकभन्दा बाहिरको जीवनोपयोगी ज्ञान प्रदान गर्नुका साथै सचेत, जिम्मेवार र सहयोगी नागरिक बन्ने सोच विकास गर्ने अवसर दिएको थियो।