विरेन्द्र बाग: राष्ट्रिय स्वतन्त्र पार्टी (रास्वपा) भित्र उम्मेदवार छनोट प्रक्रिया अपारदर्शी र बन्द कोठे भएको आरोपसहित असन्तुष्टि सतहमा आएको छ। स्थानीय तहबाट सिफारिस भएका नेताहरूलाई बेवास्ता गर्दै सिफारिसमै नपरेका व्यक्तिलाई टिकट दिइएको भन्दै कैलाली क्षेत्र नम्बर–५ बाट २०७९ सालका उम्मेदवार इश्वरी बिष्टले स्वतन्त्र उम्मेदवारी घोषणा गरेका छन्।
कैलाली–५ बाट प्रतिनिधिसभा निर्वाचनमा स्वतन्त्र रूपमा मैदानमा उत्रिने घोषणा गर्दै बिष्टले पार्टीभित्रको बन्द कोठामा हुने राजनीतिलाई सिधै अस्वीकार गरेका छन्।
“म चुनाव आउँदा मात्र देखिने अनुहार होइन,” बिष्टले भने, “सडक, खेत, बस्ती र गाउँ–टोलमै जनतासँगै संघर्ष गर्दै आएको, जनताको दुःख–सुखमा सधैं उभिने प्रतिनिधि हुँ।”
जनताको पसिनाको गन्ध बुझेको, पीडाको आवाज बोकेको र निरन्तर संघर्षबाट यहाँसम्म आइपुगेको दाबी गर्दै उनले अब कैलाली–५ लाई भाषण होइन, काम गर्ने प्रतिनिधि चाहिएको स्पष्ट पारे।
“आश्वासन होइन, उत्तरदायी नेतृत्व आजको आवश्यकता हो,” बिष्टको जोड छ।
स्वतन्त्र उम्मेदवारीको घोषणासँगै उनले आफ्ना साथी, शुभेच्छुक तथा क्षेत्रवासी दाजुभाइ–दिदीबहिनीहरूलाई एकताबद्ध साथ, सक्रिय सहयोग र बलियो समर्थनका लागि खुला आह्वान गरेका छन्।
“तपाईंहरूको साथले पुरानो राजनीतिक संस्कार तोड्नेछ, भ्रष्टाचार र बेवास्ताको अन्त्य गर्नेछ र कैलाली–५ मा वास्तविक परिवर्तनको ढोका खोल्नेछ,” उनले विश्वास व्यक्त गरे।
रास्वपाभित्र टिकट वितरणलाई लिएर कैलालीसहित विभिन्न जिल्लामा बढ्दो असन्तुष्टिको संकेतका रूपमा बिष्टको स्वतन्त्र उम्मेदवारीलाई हेरिएको छ, जसले पार्टीभित्रको आन्तरिक लोकतन्त्र र निर्णय प्रक्रियामाथि गम्भीर प्रश्न उठाएको छ।
