दैलेख, वैशाख २१ — दैलेखको आठबीस नगरपालिका–४, जिरोपोइन्ट नजिक घाँस काट्ने क्रममा करेन्ट लागेर एक युवकको ज्यान गएको छ।
स्थानीय २९ वर्षीय नगेन्द्र बहादुर माझीको आज साँझ करिब ५ बजेको समयमा मृत्यु भएको हो। माझी रुखमा चढेर घाँस काटिरहेका बेला नजिकैको उच्च भोल्टेजको विद्युत लाइन रुखमा प्रवाहित भएपछि करेन्ट लागेर घटनास्थलमै ज्यान गएको प्रहरीले जनाएको छ।
इलाका प्रहरी कार्यालय राकम कर्णालीका प्रहरी प्रमुख छत्रबहादुर ढकालको नेतृत्वमा टोली घटनास्थलमा पुगेर प्रारम्भिक अनुसन्धान थालेको छ। घटनास्थलमै मृत शरीर रहेको र उठाउने प्रक्रिया भइरहेको प्रहरीले जानकारी दिएको छ।
स्थानीयवासीका अनुसार उक्त क्षेत्रमा विद्युत लाइन र घना रुखका कारण जोखिम बढिरहेको छ। यसअघि पनि यस्तै खालका घटनाहरूका कारण जनधनको क्षति हुँदै आएको बताइएको छ।
प्रहरीले घटनाको थप अनुसन्धान गरिरहेको जनाएको छ।
