काठमाडौँ, २२ वैशाख — प्रतिनिधिसभा सदस्य डा. अमरेशकुमार सिंहले भुटानी शरणार्थी प्रकरणमा भइरहेको अनुसन्धान सरकारकै कारण प्रभावित भएको आरोप लगाएका छन्।
सोमबारदेखि सुरु भएको नीति तथा कार्यक्रममाथिको प्रतिनिधिसभा बैठकमा भाग लिँदै स्वतन्त्र सांसद सिंहले सुशासनको कुरा व्यवहारमा देखिनुपर्ने उल्लेख गरे।
“भुटानी शरणार्थी प्रकरणकै कारण यो सरकार बनेको हो,” सांसद सिंहले भने, “मैले यही संसदमा सर्ट खोलेर प्रदर्शन गर्दै निष्पक्ष अनुसन्धानको माग गरेको थिएँ। तर अहिले त्यो अनुसन्धान कहाँ पुग्यो?” उनले वाइडबडी र टेरामक्सजस्ता ठूला घोटालाको अनुसन्धान पनि थन्किएको उल्लेख गरे।
सिंहले वर्तमान सरकार भ्रष्टाचारमा लिप्त रहेको र विदेशी ऋण लिँदै दुरुपयोग गरिरहेको आरोप लगाए। “सरकारमा बस्नेहरूमा सत्ताको उन्माद देखिएको छ,” उनले भने, “साना दल, जनजाति, दलित, महिला र मधेशीमाथि यो सरकारले चुनौति दिएको छ। दुईतिहाइको सरकार नांगो हिँडिरहेको छ।”
उनले सरकारको प्राथमिकता गलत दिशामा रहेको भन्दै शिक्षा, स्वास्थ्य र सडकजस्ता आधारभूत सेवा प्रणाली ध्वस्त भइरहेको गुनासो गरे। “सरकारको प्राथमिकता पानीजहाज र रेलमा छ,” उनले भने, “तर अहिले देशलाई सडक आवश्यक छ, त्यसमा ध्यान छैन।”
सिंहले सरकारले बिचौलियामार्फत शासन सञ्चालन गरिरहेको र दलालतन्त्रको विकास गरिरहेको दाबी गरे। साथै, सरकारले आफ्ना नातेदारलाई विश्वविद्यालयमा भीसी र रेक्टर बनाउने उद्देश्यले नयाँ विश्वविद्यालय खोल्न खोजिरहेको आरोप पनि लगाए।
