कञ्चनपुर: जेठ २० — सार्वजनिक यातायात व्यवसायीहरुले घोषणा गरेको देशव्यापी चक्काजाम कार्यक्रम फिर्ता लिने भएका छन्। गण्डकी प्रदेश सरकारले ल्याएको राइडसेयरिङसम्बन्धी नियमावली स्थगन गर्न संघीय सरकार तयार भएपछि चक्काजामको कार्यक्रम फिर्ता लिने सहमति भएको हो।
सोमबार राति सरकारी वार्ता टोली र नेपाल यातायात व्यवसायी राष्ट्रिय महासंघबीच भएको तेस्रो चरणको वार्तामा यस्तो सहमति जुटेको हो। महासंघका अध्यक्ष विजयबहादुर स्वाँरले प्रधानमन्त्री कार्यालयमार्फत् गण्डकी प्रदेश सरकारलाई नियमावली स्थगनका लागि पत्राचार गरिने भएपछि आफूहरूले चक्काजाम फिर्ता लिने बताएका छन्।
सहमति अनुसार कार्यदलले सहमतिका विषय संकलन गरेर भौतिक पूर्वाधार तथा यातायात मन्त्रालयलाई पत्राचार गर्ने, मन्त्रालयले प्रधानमन्त्री तथा मन्त्रिपरिषद् कार्यालयलाई सिफारिस गर्ने र प्रधानमन्त्री कार्यालयले प्रदेश सरकारलाई पत्र पठाउनेछ।
सरकारी वार्ता टोलीका संयोजक तथा मन्त्रालयका सहसचिव कृष्ण पन्थका अनुसार मंगलबार कार्यालय खुलेलगत्तै पत्राचार प्रक्रिया अघि बढ्ने र आन्दोलन पनि अन्त्य हुने विश्वास गरिएको छ।
