विरेन्द्र बाग, कञ्चनपुर – असार ८ भीमदत्त नगरपालिकाको १२औँ कार्यपालिका बैठकमा राजनीतिक ध्रुवीकरण र आन्तरिक टकरावले चरम रूप लिएको छ। बैठकमा भीमदत्त–१८ का वडाध्यक्ष रविन्द्र प्रसाद देवकोटा बैठकमै अपमानित भएको आरोप सार्वजनिक भएको छ, जसले स्थानीय तहमा दलगत पूर्वाग्रह र विभेदको गन्ध झनै बलियो बनाएको छ।
वडाध्यक्ष देवकोटाले पूर्वाधार विकास अन्तर्गत खैरभट्टी–सिचाइ क्याटर–निकुञ्ज मार्ग र निम्बुखेडाको शिव–पार्वती टोल सडक कालोपत्रे योजनाका लागि बजेट माग गरेका थिए। तर, बैठकमै भीमदत्त–११ का वडाध्यक्ष प्रकाश थापा आक्रोशित हुँदै योजनाको विरोध मात्र नगरी धम्कीपूर्ण व्यवहार देखाएको उनको आरोप छ।
> “जनताको मागअनुसार योजना राख्दा ममाथि बैठकमै दुर्व्यवहार भयो। उहाँ (थापा) ले भने, ‘देखाइदिन्छु’ भनेर धम्क्याउँदै बाहिरिनुभयो। यस्तो असुरक्षित वातावरणमा कसरी बैठक बस्ने?” — वडाध्यक्ष देवकोटा
घटनाप्रति मेयर पदम बोगटी र उपमेयर निलम जोशी लेखक मौन दर्शक बनेको भन्दै थप असन्तोष व्यक्त भएको छ। उल्टै उपमेयर जोशीले आफूलाई योजना तर्जुमा बैठकमा नबोलाइएको भन्दै देवकोटामाथि टिप्पणी गरेको प्रसंग समेत बैठकमा उठेको छ।
वडाध्यक्ष देवकोटा नेकपा एमालेबाट निर्वाचित हुन् भने प्रकाश थापा नेपाली कांग्रेसबाट। अहिले एमाले नगरमा प्रतिपक्षमा छ, र कांग्रेस बहुमतमा रहेको अवस्थामा यस्तो राजनीतिक कटुताले स्थानीय तहको कार्यक्षमता र निष्पक्षतामै प्रश्न उठाएको छ।
विगतमा पनि वडागत विभेदको आरोप लगाउँदै देवकोटाले नगरसभामा आवाज उठाउँदै आएका थिए। यसले विगतदेखि चल्दै आएको दलगत वर्चस्वको प्रवृत्तिलाई झन् पुष्टि गरेको देखिन्छ।
