विरेन्द्र बाग:सुदूरपश्चिम विश्वविद्यालय केन्द्रीय क्याम्पस महेन्द्रनगरमा साउन १४ गतेका लागि तय गरिएको स्वतन्त्र विद्यार्थी युनियन (स्ववियु) निर्वाचनको तयारीबीच विद्यार्थी संगठनहरूबीच वादविवाद चर्किएको छ। मंगलबार बिहान उम्मेदवारी दर्ता शुरु हुनु केही समयमै अखिल (क्रान्तिकारी) र नेविसंघ कार्यकर्ताबीच विवाद उत्पन्न भएपछि निर्वाचन प्रक्रिया केही समयका लागि स्थगित गरिएको हो।
निर्वाचन कार्यतालिका अनुसार बिहान १० बजेदेखि दिउँसो १ बजेसम्म उम्मेदवारी दर्ता हुने भनिए पनि नेविसंघ (नरेश पण्डित समूह) ले उम्मेदवारी दर्ता प्रक्रियामा असहमति जनाएको थियो। उनीहरूले स्वतन्त्र विद्यार्थी समूहले निर्वाचन समितिमा लगाएको तालाबारे वार्ता हुनुपर्ने माग गर्दै उम्मेदवारी दर्ता रोकिनुपर्ने अडान राखेका थिए।
अखिल क्रान्तिकारीका नेता गणेश मिश्रले निर्वाचन प्रक्रियामा बाधा पुर्याउन नेविसंघले गैरविद्यार्थीलाई क्याम्पसमा ल्याएर वातावरण विथोलेको आरोप लगाए। “हामी समयमै उम्मेदवारी दर्ताका लागि पुगेका थियौं, तर नेविसंघले विवाद सिर्जना गर्दै प्रक्रिया रोक्ने प्रयास गर्यो,” मिश्रले भने।
नेविसंघका नरेश पण्डितले भने “निर्वाचन समितिमा तालाबारे वार्ता नहुँदै दर्ता प्रक्रिया अघि बढाउनु अन्याय हो,” भन्दै थप समय माग गरिएको बताए।
छात्र संगठनबीचको विवादले गर्दा केहीबेरका लागि सूचना जारी गर्दै उम्मेदवारी दर्ता प्रक्रिया स्थगित गरिएको निर्वाचन समितिले जनाएको छ। समितिले सबै पक्षलाई संयम अपनाउन आह्वान गर्दै निर्वाचनको मिति र प्रक्रिया यथावत् रहने जानकारी दिएको छ।
सुदूरपश्चिम विश्वविद्यालयमा स्थापना भएदेखि अहिलेसम्म स्वतन्त्र विद्यार्थी युनियनको निर्वाचन हुन सकेको छैन। गत वर्ष चैतमा तय भएको निर्वाचन पनि अवरोधकै कारण स्थगित भएको थियो। यसपटकको निर्वाचन पनि अन्योलमा पर्ने हो कि भन्ने चिन्ता विद्यार्थीहरूमा देखिएको छ।
हालसम्म तीन स्वतन्त्र र १० विद्यार्थी संगठनहरूले उम्मेदवारी दर्ता प्रक्रिया अघि बढाइसकेका छन्। विद्यार्थीहरूले “चुनाव भाँड्न नपाइने, अबको स्ववियु चुनाव सम्पन्न गरिनुपर्छ” भन्ने अडान राखेका छन्।
