विरेन्द्र बाग:कञ्चनपुर, साउन ११ — कञ्चनपुरको भीमदत्त नगरपालिका, महेन्द्रनगरस्थित पार्टी कार्यालयमा आइतबार दिउँसो करिब २:३० बजे अखिल (क्रान्तिकारी) निकट विद्यार्थी नेताहरूबीच आन्तरिक विवाद हिंसात्मक झडपमा परिणत भएको छ।
झडपमा परेर अखिल (क्रान्तिकारी) का सुदूरपश्चिम इञ्चार्ज रामचन्द्र भट्ट गम्भीर घाइते भएका छन्। उनीमाथि माओवादी केन्द्रका भीमदत्त नगर कमिटी सदस्य एवं अखिल क्रान्तिकारीका निवर्तमान अध्यक्ष भुवन बिष्टले ढुंगाले प्रहार गरेको बताइएको छ।
विद्यार्थी नेताहरूका अनुसार प्रारम्भिक रूपमा भट्टले बिष्टमाथि हातपात गरेपछि विवाद चर्किएको थियो। त्यसको जवाफमा बिष्टले ढुंगा प्रहार गर्दा भट्टको टाउ र निधारमा गम्भीर चोट लागेको हो।
प्रहरी उपरीक्षक सागर बोहराका अनुसार घाइते भट्टलाई तत्काल महाकाली अञ्चल अस्पतालमा प्रारम्भिक उपचारपछि थप उपचारका लागि धनगढी रेफर गरिएको छ।
सामान्य घाइते भएका भुवन सिङ बिष्ट अहिले जिल्ला प्रहरी कार्यालय कञ्चनपुरको नियन्त्रणमा छन्।
घटनाको विस्तृत अनुसन्धान जारी रहेको प्रहरीले जानकारी दिनु भएको छ।
