विरेन्द्र बाग: कंचनपुर,पौष २४ / प्रेस चौतारी नेपाल कञ्चनपुरका जिल्ला इन्चार्ज देवराज साउदले भीमदत्त नगरपालिका–१८ जानकी टोलस्थित अमर शहीद आधारभूत विद्यालयमा अध्ययनरत बहिरा विद्यार्थीहरूलाई फलफूल वितरण गरेका छन्।
विद्यालयमा कक्षा १ देखि ५ सम्म अध्ययनरत ३३ जना बहिरा विद्यार्थी रहेका छन्। जसमा १५ जना छात्र र १८ जना छात्रा छन्। फलफूल वितरणका क्रममा विद्यार्थीहरूको अनुहारमा देखिएको मुस्कानले कार्यक्रमलाई अझ भावनात्मक बनाएको थियो।
विद्यालयमा बहिरा विद्यार्थीको शिक्षाका लागि ५ जना कर्मचारी कार्यरत छन्। तीमध्ये २ जना स्थायी दरबन्दी, २ जना भीमदत्त नगरपालिकाको अनुदानमा तथा १ जना नेपाल सरकारको अनुदान कर्मचारी रहेका छन्। स्थायी दरबन्दी विशेष स्रोत शिक्षकका रूपमा सोमराज जोशी र स्रोत शिक्षक सुमित्रा थापा कार्यरत छन्।
कक्षा अनुसार विद्यार्थी संख्या हेर्दा कक्षा १ मा ७ जना, कक्षा २ मा ४ जना, कक्षा ३ मा ५ जना, कक्षा ४ मा ७ जना र कक्षा ५ मा ७ जना विद्यार्थी अध्ययनरत छन्।
बहिरा विद्यार्थीको पठनपाठन २०५३ सालदेखि सुरु गरिएको हो। सुरुमा निङ्गलाशैनीमा सञ्चालन हुँदै आएको कक्षा २०७६ सालमा नेपाल सरकारको निर्णयअनुसार अमर शहीद आधारभूत विद्यालयमा स्थानान्तरण गरिएको थियो।
फलफूल वितरण गर्दै इन्चार्ज साउदले अपाङ्गता भएका बालबालिकाको शिक्षा, स्वास्थ्य र पोषणमा सबै पक्षको साझा दायित्व रहेको उल्लेख गर्दै यस्ता सामाजिक कार्यलाई निरन्तरता दिने प्रतिबद्धता व्यक्त गरे।
कार्यक्रमले बहिरा विद्यार्थीहरूको मनोबल बढाएको र समावेशी शिक्षाप्रति सकारात्मक सन्देश दिएको विद्यालय परिवारले जनाएको छ।
