काठमाण्डौ ।
प्रतिनिधि सभाको बैठक कक्षभित्र अब फोटो खिच्न, अडियो तथा भिडियो रेकर्ड गर्न नपाइने व्यवस्था प्रस्ताव गरिएको छ। प्रतिनिधि सभा कार्यसञ्चालन नियमावलीको मस्यौदामा यस्तो प्रावधान समावेश गरिएको हो।
मस्यौदाको नियम २० अन्तर्गत ‘बैठकमा पालन गर्नुपर्ने नियम’ शीर्षकको उपनियम (ट) मा बैठक कक्षमा मोबाइल फोन साइलेन्ट अवस्थामा राख्नुपर्ने, फोनमा कुरा गर्न नपाइने तथा फोटो, अडियो र भिडियो रेकर्ड गर्न नहुने उल्लेख गरिएको छ।
यसअघि प्रचलित कार्यसञ्चालन नियमावलीमा यस्तो व्यवस्था थिएन। नयाँ मस्यौदाले बैठक सञ्चालनमा अनुशासन कायम गर्ने उद्देश्य राखेको बुझिएको छ।
