कञ्चनपुर । राष्ट्रिय स्वतन्त्र पार्टी (रास्वपा) को पहिलो ऐतिहासिक महाधिवेशन आगामी असार ७, ८ र ९ गते हुने भएको छ। महाधिवेशनलाई लक्षित गर्दै समाजसेवी तथा पार्टीकी सक्रिय नेतृ चाँदनी ऐर (चन्द्रा) ले केन्द्रीय सदस्य पदमा उम्मेदवारी दिने घोषणा गरेकी छन्।
पार्टी स्थापनाअघिदेखि नै विभिन्न सामाजिक तथा नागरिक आन्दोलनमा सक्रिय रहँदै आएकी ऐर निमुखा, पीडित तथा आवाजविहीन नागरिकहरूको पक्षमा आवाज उठाउँदै आएकी व्यक्तिका रूपमा परिचित छन्। सामाजिक सेवासँगै रास्वपाको संगठन विस्तार, जनसम्पर्क तथा पार्टी गतिविधिमा निरन्तर सक्रिय भूमिका निर्वाह गर्दै आएकी उनले व्यक्तिगत लाभभन्दा पार्टी र सिद्धान्तलाई प्राथमिकता दिँदै आएकी छन्।
२०७९ सालको प्रतिनिधिसभा निर्वाचनमा समानुपातिक बन्दसूचीको तेस्रो नम्बरमा रहे पनि सांसद बन्ने अवसर नपाएकी ऐरले २०८२ सालमा पनि समानुपातिकतर्फ उम्मेदवारी दिँदै पार्टीप्रति आफ्नो प्रतिबद्धता दोहोर्याएकी थिइन्। आफू कुनै पद वा अवसरको अपेक्षा नगरी दिनरात पार्टीको हितका लागि खटिँदै आएको उनका समर्थकहरूको भनाइ छ।
रास्वपाको स्थापना कालदेखि नै संगठन निर्माण, जनचेतना अभिवृद्धि र सामाजिक अभियानहरूमा सक्रिय रहँदै आएकी ऐरको उम्मेदवारीले महाधिवेशनमा थप चर्चा पाएको छ। पार्टीका नेता तथा कार्यकर्ताहरूले उनको लामो संघर्ष, त्याग र योगदानलाई सम्मान गर्दै नेतृत्व तहमा पुग्ने अवसर दिनुपर्ने धारणा व्यक्त गरिरहेका छन्।
रास्वपाको पहिलो महाधिवेशनले आगामी नेतृत्व चयनसँगै पार्टीको भावी दिशा तय गर्ने अपेक्षा गरिएको छ।
