राष्ट्रिय स्वतन्त्र पार्टी (रास्वपा) का सभापति रवि लामिछाने कास्की जिल्ला अदालतको आदेशमा हिरासतमुक्त भए पनि रहस्यमय रूपमा मौन छन्। धरौटी बुझाएर रिहा भएयता सामाजिक सञ्जाल, मिडिया वा कुनै सार्वजनिक मञ्चमा उनले कुनै प्रतिक्रिया दिएका छैनन्। पार्टी स्रोतका अनुसार, लामिछाने अहिले रास्वपाको समग्र समीक्षा गर्दै रणनीतिक प्रतिवेदन तयार पारिरहेका छन्, जुन उनले केन्द्रीय समिति बैठकमा पेस गर्ने तयारी छ।
तर, उनको यो मौनता स्वाभाविक मात्र हो कि रणनीतिक? कि डरको संकेत? प्रमुख प्रतिपक्षी दलहरू समेत लामिछानेको मौनताप्रति असहज देखिन्छन्। एक रास्वपा नेताका अनुसार, ‘पत्रकारहरू चासो राखिरहेका छन्, अरू पार्टीहरूलाई चिन्ता छ। रविले बोलेको भए प्रतिक्रियाहरू आउँथे, आलोचना हुन्थ्यो, तर उनले पूरै मौनता अख्तियार गर्दा अरूले नै बोल्न नपाउने अवस्था सिर्जना भएको छ।’
हिरासत बसाइको अनुभवबारे उनले डायरी लेख्ने सोच राखे पनि लेख्न भने सुरु गरिसकेका छैनन्। राजनीतिक रूपमा ‘ठग’ को आरोप खेपिरहेका लामिछानेलाई अदालतले सफाइ दिएपछि आलोचकहरू निरुत्तर बनेका छन्। लामिछानेका लागि यो अवसर हो वा चुनौती? उनी रणनीतिक रूपमा अघि बढिरहेका छन् वा संकट टार्न मौन छन्? यी प्रश्नहरूको जवाफ आउँदो दिनमा स्पष्ट हुनेछ।
