डडेलधुराबाट धनगढीतर्फ जाँदै गरेको हायस र धनगढीबाट बझाङतर्फ गइरहेको यात्रुबाहक बस चुरे गाउँपालिका–३ सल्लेरीमा आपसमा ठोक्किँदा तीन जना यात्रु घाइते भएका छन्।
परशुराम नगरपालिका–१२ जोगबुडाबाट धनगढीका लागि छुटेको सुप–प्र ०२–००१ ज ५०७ नम्बरको इभी हायस र धनगढीबाट बझाङतर्फ जाँदै गरेको सुप–प्र ०२–०१६ प १२५२ नम्बरको बस सल्लेरीमा एकआपसमा ठोक्किएका हुन्। शुक्रबार बिहान भएको उक्त दुर्घटनामा दुई महिला र एक पुरुष घाइते भएका हुन्।
जिल्ला प्रहरी कार्यालय कैलालीका प्रहरी निरीक्षक लोकराज जोशीका अनुसार घाइते हुनेहरूमा हायसका चालक परशुराम–१२ निवासी २६ वर्षीय कमल धामी, हायसमा सवार सोही ठाउँकी ९ वर्षीया प्रतीक्षा सिंजा मगर र बसमा सवार कञ्चनपुरको कृष्णपुर नगरपालिका–३ की ३० वर्षीया निर्मला भट्ट रहेका छन्।
घाइते तीनै जनाको धनगढीस्थित अस्पतालमा उपचार भइरहेको प्रहरीले जनाएको छ। उनीहरूको अवस्था खतरामुक्त रहेको प्रारम्भिक जानकारीमा उल्लेख गरिएको छ। दुर्घटनाको कारणबारे अनुसन्धान भइरहेको छ भने अन्य यात्रुहरू भने सकुशल रहेका छन्।
प्रहरीका अनुसार उक्त स्थानमा सडक साँघुरो र मोडहरु बढी भएकाले सावधानी अपनाउन जरुरी रहेको छ। स्थानीयले दुर्घटनास्थलमा पुगेर तत्काल उद्धार कार्यमा सहयोग गरेका थिए।
