विरेन्द्र बाग: कन्चनपुर , जेठ ९ – गृह मन्त्रालय अन्तर्गत भिजिट भिसाका नाममा विदेश जान चाहनेहरूलाई ठगी गर्ने र मानव तस्करीमा संलग्न एउटा ठूलो सञ्जाल खुलेको छ। यस अवैध सञ्जालमा गृह मन्त्रालयको सचिवालय र त्रिभुवन अन्तर्राष्ट्रिय विमानस्थलस्थित अध्यागमन कार्यालयका उच्च अधिकारीहरू समेत संलग्न रहेको प्रमाण फेला परेको छ।
सूचनाका अनुसार, भिजिट भिसामा वैदेशिक रोजगारीका लागि जान चाहने व्यक्तिहरूबाट प्रतिदिन झन्डै ५० लाख रुपैयाँसम्म असुली हुने गरेको छ। यस कार्यमा विमानस्थलस्थित अध्यागमन कार्यालयका प्रमुख तीर्थराज भट्टराई र गृहमन्त्री रमेश लेखकको सचिवालयमा कार्यरत नरवीर खड्का प्रत्यक्ष संलग्न रहेको पाइएको छ।
उल्लेखनीय छ, नरवीर खड्का यसअघि पनि भिजिट भिसासम्बन्धी गैरकानुनी सेटिङमार्फत ‘अपरेशन’ चलाउँदै गर्दा पक्राउ परेका थिए। त्यसपछि पनि उनी फेरि गृहमन्त्रीको सचिवालयमा पुगेका छन्। स्रोतका अनुसार, गृहमन्त्री लेखकले स्वयम् रोजेर भट्टराईलाई अध्यागमनमा खटाएका थिए।
मानव तस्करीजस्तो जघन्य अपराधमा सरकारकै उच्च तहका व्यक्तिहरूको संलग्नता देखिनु अत्यन्तै गम्भीर विषय हो। भिजिट भिसाको नाममा भइरहेको अवैध कारोबारले नेपालबाट विदेश जाने सयौँ युवा–युवतीलाई ठगिएको र जोखिमपूर्ण अवस्थामा पुर्याइएको छ।
यस घटनाले ‘समृद्धि’को नाममा ‘तस्करी’लाई प्रोत्साहन गरिएको गम्भीर आशंका जन्माएको छ। अब प्रश्न उठेको छ– के राज्यसंयन्त्रभित्रका पाका तस्करहरूलाई कारबाही हुनेछ?
