विरेन्द्र बाग: कन्चनपुर,१४ असार – स्वर्गीय जननेता मदन भण्डारीकी जेठी छोरी तथा मदन भण्डारी फाउन्डेशनकी अध्यक्ष उषाकिरण भण्डारीले फाउन्डेशनलाई षड्यन्त्रको दृष्टिकोणबाट हेर्न नहुने स्पष्ट पार्नुभएको छ।
शनिबार काठमाडौंमा आयोजित ७४ औं मदन जयन्तीको अवसरमा प्रधानमन्त्री तथा एमाले अध्यक्ष केपी शर्मा ओली र पूर्वराष्ट्रपति विद्यादेवी भण्डारीको उपस्थितिमा बोल्दै अध्यक्ष भण्डारीले पछिल्लो समय फाउन्डेशनलाई लिएर भइरहेका राजनीतिक टिप्पणी र वहसप्रति जवाफ दिँदै फाउन्डेशनको उद्देश्य जनताको बहुदलीय जनवाद (जबज) लाई व्यवहारमा उतार्नु रहेको बताउनुभयो।
‘कन्स्पिरेसी थ्योरी बनाउने प्रयास भइरहेको छ, तर हामी विचलित हुँदैनौं,’ उषाकिरणको भनाइ थियो।
उनले फाउन्डेशन कुनै व्यक्तिगत स्वार्थ वा गुटगत सोचले होइन, मदन भण्डारीले देखाएको मार्गदर्शनलाई व्यवहारमा उतार्ने जिम्मेवारीबोधका साथ अघि बढेको बताइन्।
फाउन्डेशनले जनताको बहुदलीय जनवादको विषयमा देशव्यापी बहस, अनुसन्धान र प्राज्ञिक संवादको अभियान थालेको उल्लेख गर्दै उनले त्रिभुवन विश्वविद्यालयका ११ विभागसँग मिलेर स्नातकोत्तर, एमफिल र विद्यावारिधि तहमा जबजबारे अनुसन्धान गर्ने विद्यार्थीहरूलाई छात्रवृत्ति दिने सम्झौता भएको जानकारी दिइन्।
‘जबजको प्राज्ञिक अध्ययन मात्रै होइन, भावी पुस्तालाई हस्तान्तरण नै हाम्रो मुख्य उद्देश्य हो,’ उनले भनिन्।
उनका अनुसार जबज मार्क्सवादको आधुनिक र सिर्जनात्मक व्याख्यामा आधारित विचार हो, जसलाई अनुसन्धानको दायरामा ल्याएर समकालीन राजनीतिक सोचसँग जोड्ने प्रयास भइरहेको छ।
एमालेभित्रै पछिल्लो समय फाउन्डेशनका गतिविधि र त्यसको उद्देश्यबारे उठेका प्रश्न र विवादबीच उषाकिरणको यस्तो स्पष्ट धारणा सार्वजनिक रूपमा आएको छ। यो भनाइलाई फाउन्डेशनको औपचारिक र नीतिगत स्पष्टीकरणको रूपमा पनि हेरिएको छ।
मदन भण्डारीको नाममा स्थापित उक्त फाउन्डेशनले अब जबजको सैद्धान्तिक पक्ष, व्यवहारिक प्रयोग र ऐतिहासिक योगदानका पक्षमा बहस र लेखनलाई निरन्तरता दिने तयारी गरिरहेको समेत उनले जानकारी दिइन्।
