बझाङको जयपृथ्वी नगरपालिका–९ स्थित सिमखेत पुरानो बसपार्क नजिक अटो दुर्घटना हुँदा चालकसहित चारजना घाइते भएका छन्।
जिल्ला प्रहरी कार्यालय बझाङका अनुसार दुर्घटना गएराति करिब ८:५० बजेको समयमा भएको हो। चैनपुरबाट झोतातर्फ जाँदै गरेको सुप्र ०१–००१ ह ६२७५ नम्बरको अटो अचानक अनियन्त्रित भई सडकको छेउमा पल्टिएको थियो।दुर्घटनामा परेर अटो चालक केदारस्यु गाउँपालिका–९ का २४ वर्षीय विकास गिरी छातिमा चोट लागी मध्यम घाइते भएका छन्। त्यस्तै, सोही दुर्घटनामा केदारस्यु गाउँपालिका–१ का २९ वर्षीय दिनेश भण्डारी, केदारस्यु–९ का ३६ वर्षीय दीपक धामी र दुर्गाथली गाउँपालिका–३ का ३८ वर्षीय शिवराज कठायत घाइते भएका छन्।
उनीहरूलाई टाउको, हातखुट्टा तथा शरीरका विभिन्न भागमा चोट लागेको जनाइएको छ।
घटनाको खबर पाएलगत्तै जिल्ला प्रहरी कार्यालयबाट प्रहरी टोली घटनास्थलमा पुगेर तत्काल उद्धार कार्य गरेको थियो। उद्धारपछि घाइतेहरूलाई जिल्ला अस्पताल बझाङमा उपचारका लागि पठाइएको प्रहरीले जनाएको छ।
हाल घाइते सबैको स्वास्थ्य अवस्था मध्यम रहेको जनाइएको छ। दुर्घटनाको कारणबारे अनुसन्धान भइरहेको प्रहरीको भनाइ छ।
