नेपाल निजामती कर्मचारी संगठनको १२ औं महाधिवेशनबाट गणेश पनेरु केन्द्रिय सदस्य पदमा निर्वाचित भएका छन्।लामो समयदेखि कर्मचारीहरूको हक, अधिकार र संस्थागत सुधारका लागि योगदान पुर्याउँदै आएका पनेरु केन्द्रिय नेतृत्वमा पुगेका छन्।
कर्मचारी क्षेत्रमा कर्मनिष्ठ, इमानदार तथा परोपकार भावनाका रूपमा चिनिएका पनेरुले विगतका विभिन्न कालखण्डमा उनले विभिन्न संगठनहरू, राजनीतिक तथा सामाजिक गतिविधिमा सक्रिय भूमिका निर्वाह गर्दै आएका छन्। उनको यही योगदान र सक्रियताका कारण निजामती कर्मचारी संगठनको केन्द्रिय नेतृत्वसम्म पुग्न सफल भएका हुन्।
हाल गोदावरी नगरपालिकामा कार्यरत पनेरुले कर्मचारीहरूका समस्या समाधान तथा समग्र विकासका विषयमा विशेष चासो राख्दै आएका छन्। उनी कर्मचारीहरूको हकहितका सवालमा स्पष्ट धारणा राख्दै संगठनभित्र सशक्त आवाज उठाउँदै आएका छन्।
पनेरुको निर्वाचित भएपछि विभिन्न राजनीतिक, सामाजिक तथा कर्मचारी संगठनका व्यक्तित्वहरूले उनलाई शुभकामना व्यक्त गरिरहेका छन्। निर्वाचित भएपछि आफ्नो प्रतिक्रिया व्यक्त गर्दै उनले संगठनभित्र रहनुका मुख्य उद्देश्यहरूबारे स्पष्ट पारे। “म जहिले पनि कर्मचारी हितका लागि आवाज उठाउने छु। संगठनलाई थप सुदृढ बनाउने, कर्मचारीहरूका समस्या समाधानका लागि पहल गर्ने मेरो पहिलो प्राथमिकता हुनेछ,” उनले भने।
उनले संगठनभित्र आफूलाई विश्वास गरेर सहयोग गर्ने सम्पूर्णलाई आभार व्यक्त गर्दै आगामी दिनमा अझै समर्पित भएर काम गर्ने प्रतिबद्धता व्यक्त गरे। उनका अनुसार, संगठनलाई अझ व्यवस्थित, सक्षम र सशक्त बनाउन नयाँ रणनीतिसहित अघि बढ्ने योजना रहेको छ।
पनेरुको यो जितलाई कर्मचारी संगठनभित्र नयाँ उत्साहका रूपमा हेरिएको छ। उनका समर्थकहरूले संगठनभित्र सुधार, सशक्त नेतृत्व र कर्मचारी हितमा ठोस कदम चाल्ने अपेक्षा व्यक्त गरेका छन्।
