काठमाण्डौ ।
प्रहरी प्रधान कार्यालयले कैलालीका प्रहरी उपरीक्षक (एसपी) बालनरसिंह राणालाई जिम्मेवारीबाट हटाएको छ। जिल्लामा शान्ति–सुरक्षा कायम गर्न असफल भएको ठहर गर्दै उनलाई कारबाहीस्वरूप सरुवा गरिएको हो।
गत वैशाखमा मात्र कैलाली पुगेका राणाको पाँच महिनामै सरुवा भएको हो। कैलाली कारागारमा भएको पछिल्लो झडपपछि उनको कार्यक्षमतामाथि गम्भीर प्रश्न उठेको थियो।
राणाको स्थानमा एसपी नरेन्द्र चन्दलाई पठाइएको प्रहरी प्रवक्ता डिआइजी विनोद घिमिरेले जानकारी दिए।
यसअघि सोही घटनामा सुरक्षा समन्वयमा कमजोरी देखिएको भन्दै प्रमुख जिल्ला अधिकारी (सीडीओ) गोगनबहादुर हमाललाई साउन २८ गते नै केन्द्रमा तानिएको थियो। हाल दाङका सीडीओ कृष्णप्रसाद लम्साललाई कैलाली खटाइएको छ।
