विरेन्द्र बाग:कञ्चनपुर ,नेकपा एमाले निकट अखिल (अनेरास्ववियु) ले काठमाडौं महानगरका प्रमुख बालेन्द्र शाह (बालेन) र ‘हामी नेपाल’ नामक गैरसरकारी संस्थाका संयोजक सुदन गुरुङविरुद्ध औपचारिक उजुरी दर्ता गरेको छ।
गत २४ भदौको जेन–जी आन्दोलनमा घुसपैठ गराई विद्यार्थीको हत्या, निजी तथा सार्वजनिक सम्पत्ति लुटपाट, तोडफोड र आगजनीसम्मको घटनामा संलग्न गराएको आरोपसहित उजुरी पेस गरिएको हो।
अनेरास्ववियु कञ्चनपुरका संयोजक विक्रम थापाका अनुसार, संगठनको केन्द्रीय निर्देशनअनुसार जिल्लाबाटै उजुरी दर्ता गरिएको हो। उनले भने,
“जेन–जी आन्दोलनलाई अस्थिरता फैलाउने माध्यम बनाउने काम बालेन र सुदनले गरेका हुन्। ती घटनाका मुख्य योजनाकार भएकाले कानुनअनुसार कडा कारबाही हुनुपर्छ।”
थापाले दाबी गरे अनुसार उजुरीमा मुलुकी फौजदारी संहिता, २०७४ को दफा १७७, १७८, २४४ र २८५(२)(क) बमोजिम कारबाही माग गरिएको छ।
संगठनले देशभरका इकाइहरूबाट पनि यस्तै उजुरी दर्ता गर्ने तयारी गरेको जानकारी दिनु भएकोे छ।
यससँगै, राजधानीको राजनीतिमा नयाँ तरंग पैदा भएको छ— किनकि यो पहिलो पटक हो जब कुनै विद्यार्थी संगठनले काठमाडौं महानगरका प्रमुख विरुद्ध औपचारिक कानुनी चुनौती दिएको हो।
