कैलाली : महिलाहरूका अधिकार र हकहितका सवालमा आवाज उठाउँदै, सामुदायिक सुरक्षा जालो कार्यक्रम महिलाहरूको सारथी बन्दै गएको छ। गौरीगंगा नगरपालिका–९, शंकरपुरमा सम्पन्न उक्त कार्यक्रम टेवा नेपाल, काठमाडौँ र सामुदायिक सुरक्षा जालोको आयोजनाम संयुक्त आयोजनामा सम्पन्न भएको हो।
कार्यक्रमका प्रमुख अतिथि गौरीगंगा नगरपालिका–११ का वडा अध्यक्ष साहेब लाल चौधरी, विशिष्ट अतिथि महिला शाखा प्रमुख भावना जोशी, र टेवा नेपालकी कार्यक्रम अधिकृत सरस्वती श्रेष्ठ हुनुहुन्थ्यो। कार्यक्रममा विभिन्न राजनीतिक दलका पदाधिकारी, महिला अगुवा, युवा तथा सरोकारवाला निकायका प्रतिनिधिहरूको समेत उपस्थिति रहेको थियो।
सार्वजनिक छलफलका क्रममा वक्ताहरुले सामुदायिक सुरक्षा जालोले स्थानीय तहमा रहेका पीडित महिलाहरूका लागि सहयोगी माध्यमको रूपमा काम गरिरहेको बताएका थिए। उनीहरूले महिलाहरूका हक र अधिकारका मुद्दालाई सशक्त रूपमा अघि बढाउन सामूहिक प्रयास आवश्यक रहेकोमा जोड दिएका थिए।
महिला शाखा प्रमुख भावना जोशीले महिलाका हक र अधिकार सुनिश्चित गर्न स्थानीय सरकार निरन्तर प्रयत्नशील रहेको बताउँदै, आगामी दिनमा महिला नेतृत्वको प्रतिनिधित्व अझ बलियो बनाउनुपर्ने धारणा राख्नुभयो।
त्यस्तै टेवा नेपालकी सरस्वती श्रेष्ठले सामुदायिक सुरक्षा जालो कार्यक्रमले स्थानीय तहमा लैंगिक समानता र न्याय सुनिश्चित गर्न महत्वपूर्ण भूमिका खेलेको बताउँदै, यसले नागरिक र निकायबीच विश्वासको वातावरण निर्माण गरेको बताउनुभयो।
कार्यक्रमका प्रमुख अतिथि वडा अध्यक्ष साहेब लाल चौधरीले समाजमा लैंगिक हिंसा, भेदभाव र अन्यायका घटनाहरू अन्त्य गर्न प्रहरी, नागरिक र संघसंस्थाबीचको सहकार्य अत्यावश्यक रहेको बताउनुभयो। उहाँले महिलाको राजनीतिक सहभागिता आगामी निर्वाचनमा सुनिश्चित गर्न सबैलाई सक्रिय हुन आह्वान गर्नुभयो।
छलफलका सहभागीहरूले आगामी निर्वाचनमा महिला नेतृत्वको प्रभावकारी सहभागिता, हक र अधिकारका सवालमा महिला सशक्तीकरण, तथा समाजमा विद्यमान लैंगिक असमानता न्यूनीकरणका उपायहरूबारे सुझाव पनि प्रस्तुत गरेका थिए।
कार्यक्रममा करिब ५५ जना महिला सहभागी रहेका थिए। सहभागीहरूले कार्यक्रमले समुदायमा चेतना र सहकार्यको वातावरण सिर्जना गर्न सहयोग पुगेको अनुभूति व्यक्त गरेका थिए।
कार्यक्रमको सभाध्यक्षता सामुदायिक सुरक्षा जालो कैलालीकी याम माया ढकालले गर्नुभएको थियो भने कार्यक्रमको सहजीकरण टेवा नेपालका प्रतिनिधिले गर्नुभएको थियो।
सामुदायिक सुरक्षा जालो तथा महिलावादी आन्दोलन सुदृढीकरण कार्यक्रमले स्थानीय समुदायमा महिला अधिकार र नेतृत्व सशक्तीकरणको नयाँ ऊर्जा थपेको छ।
