विरेन्द्र बाग: । कञ्चनपुरमा भूमिहीन, दलित, सुकुम्बासी तथा अव्यवस्थित बसोबासीहरूलाई लालपुर्जा वितरण गर्ने प्रक्रिया तीव्र बनाइएको छ। भूमि आयोग कञ्चनपुरले आउँदो जेठ महिनाभित्रै पहिलो चरणको लालपुर्जा वितरण प्रक्रिया सम्पन्न गर्ने तयारी गरेको हो।
आयोगका अध्यक्ष नेत्रराज पन्तका अनुसार आयोगले पहिले सेतो पुर्जा वितरण भएका व्यक्तिहरूको फाइल अध्ययन गरी प्रमाणिकरणको कामलाई प्राथमिकतामा राखेको छ। “फाइल अध्ययन गरेर आवश्यक कागजातहरू भए/नभएको जाँच भइरहेको छ,” उनले जानकारी दिए।
हालसम्म भीमदत्त नगरपालिकाका ३६० र दोधारा–चाँदनी नगरपालिकाका १४ वटा फाइलको काम सम्पन्न भइसकेको छ। अघिल्लो आयोगले जिल्लाभरिमा ४ हजार ६५ वटा सेतो पुर्जा वितरण गरिसकेको थियो।
“अघिल्ला आयोगले थालेका अधुरा कामहरू पूरा गर्दैछौँ,” अध्यक्ष पन्तले भने, “पहिलो चरणमा सेतो पुर्जा वितरण भएकालाई लालपुर्जा दिनेछौँ। त्यससँगै नयाँ आवेदन परेका फाइलहरूको प्रमाणीकरण तथा कम्प्युटर प्रणाली अद्यावधिक गर्ने कामसमेत भइरहेको छ।”
भूमिहीन दलित, सुकुम्बासी तथा अव्यवस्थित बसोबासी गरी कञ्चनपुरमा हालसम्म ७२ हजार ९३० वटा आवेदन परेको छ। आयोग गठन भएको पछिल्लो तीन महिनामा मात्र ८ हजार ९२ फाइल प्रमाणीकरण गरिएको जानकारी दिइएको छ।
स्थानीय तहका प्रमुख, वडा कार्यालय तथा सरोकारवालाहरूसँग समन्वयात्मक बैठकहरू सञ्चालन गर्नुका साथै प्राविधिकहरूलाई आवश्यक तालिमसमेत दिइएको अध्यक्ष पन्तले जानकारी दिएका छन्।
