सन्तोष धानुक:कञ्चनपुर, १७।बालजागृति क्याम्पस अनेरास्ववियु कमिटीद्वारा आयोजित “हाजिरीजवाफ प्रतियोगिता” अनेरास्ववियु जिल्ला इन्चार्ज पुष्कर राज भट्टको प्रमुख आतिथ्यतामा सम्पन्न भएको छ।
कार्यक्रममा अनेरास्ववियु बालजागृति क्याम्पस कमिटीका बिध्यार्थी नेता मुना ठगुन्ना, पवित्रा अवस्थी लगायत सम्पूर्ण टिमको सक्रिय सहभागिता रहेको थियो। प्रतियोगितामा विभिन्न विद्यार्थी समूहहरूबीच प्रतिस्पर्धा भए पनि अन्ततः विजेता टिमले उत्कृष्ट प्रदर्शन गर्दै उपाधि हात पारेका छन्।
प्रमुख अतिथि भट्टले यस्ता शैक्षिक तथा बौद्धिक क्रियाकलापहरूले विद्यार्थीहरूको ज्ञान वृद्धि गर्नुका साथै तार्किक क्षमता अभिवृद्धि गर्न महत्वपूर्ण भूमिका खेल्ने बताएका छन्। साथै, उनले आगामी दिनहरूमा पनि यस्तै सिर्जनात्मक कार्यक्रमहरू सञ्चालन गर्नुपर्ने आवश्यकता औंल्याए।
कार्यक्रम सफलतापूर्वक सम्पन्न गर्न योगदान दिने सम्पूर्णलाई आयोजक कमिटीले धन्यवाद ज्ञापन गरेको छ।
