विरेन्द्र बाग: वैशाख १५।कञ्चनपुर जिल्लाको बेलौरी नगरपालिका वडा नम्बर ८ र ९ स्थित हुलाकी सडकखण्डको स्तरोन्नति माग गर्दै स्थानीय बासिन्दा आन्दोलनमा उत्रिएका छन्। लामो समयदेखि सडकको दयनीय अवस्थाले दैनिक जीवनमा सास्ती झेल्न बाध्य स्थानीयहरूले कालोपत्रेको माग गर्दै विरोध प्रदर्शन गरेका हुन्।
स्थानीयहरूले विगत केही वर्षदेखि सम्बन्धित निकायमा सडक सुधारका लागि पटक–पटक ध्यानाकर्षण गराए पनि समस्या जस्ताको तस्तै रहेको गुनासो गरेका छन्। “हाम्रा बालबालिका विद्यालय जान सक्दैनन्, बिरामीलाई अस्पताल लैजान कठिनाइ हुन्छ। धुलो, हिलो र दुर्घटनाको जोखिमले हामी वर्षौंदेखि पिरोलिएका छौं,” आन्दोलनमा सहभागी एक स्थानीय अगुवाले बताए।
हुलाकी सडक राष्ट्रिय महत्वको आयोजना भए तापनि बेलौरीको यो खण्डमा सडकको अवस्था अत्यन्तै जर्जर रहेको छ। सडक नबन्दा स्थानीय व्यापार, कृषकहरूका उत्पादनको बजार पहुँच र एम्बुलेन्स सेवामा समेत गम्भीर असर परेको स्थानीयहरूको गुनासो छ। “हामीले सडक नभएर कति समय धुलो खाएर, हिलोमा फसेर बस्ने ? अब सहन सकिन्न, जबसम्म कालोपत्रे हुँदैन, हामी आन्दोलन रोकेर बस्ने छैनौं,” अर्का एक सहभागीले चेतावनी दिए।
स्थानीय बासिन्दाले नाराबाजी गर्दै विरोध ¥यालीसमेत निकालेका छन्। उनीहरूले सडकमा ढुंगा राखेर सवारी अवरुद्ध गर्ने प्रयास गरेका थिए भने केही समयका लागि स्थानीय यातायात सेवा पनि प्रभावित बनेको थियो। आन्दोलनकारीहरूले बेलौरी नगरपालिकासँगै हुलाकी सडक आयोजना र जिल्ला प्रशासन कार्यालय कञ्चनपुरलाई समेत ज्ञापनपत्र बुझाउने तयारी गरिरहेका छन्।
यसबीच, बेलौरी नगरपालिकाका प्रमुख प्रशासकीय अधिकृतले आन्दोलनरत स्थानीयसँग संवाद गरेर समस्या समाधानका लागि पहल गरिने आश्वासन दिएका छन्। “सडक कालोपत्रेका लागि सम्बन्धित निकायमा निरन्तर दबाब दिइरहेका छौं। यथाशीघ्र प्रक्रिया अगाडि बढाउनेछौं,” उनले भने।
यता, स्थानीयहरू भने आश्वासन मात्र नभई ठोस काम देखिनुपर्ने अडानमा छन्। यदि चाँडै सडक निर्माण प्रक्रिया सुरु नभएमा आन्दोलनलाई अझ सशक्त बनाउने चेतावनी उनीहरूले दिएका छन्।
हुलाकी सडक आयोजना अन्तर्गत बेलौरी क्षेत्रका सडक स्तरोन्नति हुनु स्थानीयहरूको दीर्घकालीन माग भए पनि कार्यान्वयन ढिलाइ हुँदा निराशा बढ्दै गएको देखिन्छ। आन्दोलनले स्थानीय प्रशासन र सम्बन्धित निकायलाई थप दबाब सिर्जना गरेको छ।
