भारतको ओडिशा राज्यस्थित KIIT विश्वविद्यालयमा अध्ययनरत नेपाली विद्यार्थी प्रिशा शाह मृत अवस्थामा फेला परेकी छिन्। यसअघि सोही विश्वविद्यालयमा अर्की नेपाली विद्यार्थी प्रकृति लम्सालको निधन भएको केही समयमै फेरि अर्को दुःखद घटना दोहोरिएको हो।
प्रिशा शाहको मृत्युले विश्वविद्यालयको विद्यार्थी सुरक्षाप्रति गम्भीर प्रश्न उठाएको छ। लगातार दोस्रो नेपाली विद्यार्थीको निधन भएपछि भारतको सबैभन्दा ठूलो विद्यार्थी संगठन अखिल भारतीय विद्यार्थी परिषद (ABVP) ले घटनाप्रति गहिरो चिन्ता व्यक्त गर्दै ओडिशा सरकारसँग KIIT विश्वविद्यालयमाथि कडा कारबाही गर्न माग गरेको छ।
ABVP का अनुसार विश्वविद्यालय प्रशासनको लापरवाही र कमजोर व्यवस्थापनका कारण यस्ता घटना दोहोरिएको हो। संगठनले घटनाको निष्पक्ष छानबिन गर्दै दोषीहरूलाई कारबाही गर्न र विदेशी (विशेषगरी नेपाली) विद्यार्थीहरूको सुरक्षाका लागि विशेष व्यवस्था गर्न सरकारलाई आग्रह गरेको छ।
नेपाली विद्यार्थी समुदायमा निरन्तर यस्ता घटनाले त्रास फैलिएको छ। उनीहरूले विश्वविद्यालय प्रशासनसँग सुरक्षा व्यवस्था सुधार्न र पारदर्शिता कायम गर्न माग गरेका छन्। यता, भारतस्थित नेपाली दूतावासले घटनाबारे जानकारी लिइरहेको र मृतकका परिवारसँग सम्पर्कमा रहेको जनाएको छ।
प्रिशा शाहको मृत्युको कारण खुल्न बाँकी रहेको र स्थानीय प्रहरीद्वारा अनुसन्धान जारी रहेको ओडिशा प्रहरीले जनाएको छ।
