विरेन्द्र बाग:कञ्चनपुर, १ जेठ — कञ्चनपुरका वरिष्ठ पत्रकार खेम भण्डारीमाथि जिल्ला अदालत कञ्चनपुर द्वारा सुनाइएको एक महिनाको कैद सजाय, १० हजार रुपैयाँ जरिवाना र एक लाख क्षतिपूर्तिको फैसला आपत्तिजनक भएको भन्दै पत्रकारिता क्षेत्र, नागरिक समाज र अभिव्यक्ति स्वतन्त्रता पक्षधरहरू बाट तीव्र आलोचना भइरहेको छ।
निर्मला पन्त बलात्कारपछि हत्या प्रकरणमा न्यायको खोजी गर्दै निरन्तर कलम चलाएका भण्डारीमाथि झुटा र व्यक्तिगत प्रतिशोधको आधारमा मुद्दा दायर गरिएको उनी निकट स्रोतको दाबी छ। तत्कालीन एसपी दिल्लीराज विष्टका छोरा किरणराज विष्टले ‘गाली बेइज्जती’को आरोप लगाउँदै मुद्दा हालेका थिए। तर पत्रकार भण्डारीले सार्वजनिक चासोका आधारमा प्रश्न उठाउँदै सामाजिक सञ्जाल र समाचार मार्फत आवाज उठाएका थिए।
“सञ्चारकर्मीलाई आवाज उठाएको आधारमा सजाय सुनाउनु अभिव्यक्ति स्वतन्त्रतामाथि प्रहार हो,” एक स्थानीय पत्रकारले भने। उनले थपे, “निर्मला प्रकरण जस्तो राष्ट्रिय चासोको विषयमा बोल्नेलाई यसरी थुन्ने कामले राज्यको नियतमाथि प्रश्न उठाएको छ।”
पत्रकार भण्डारीले आफूले न्यायको पक्षमा सत्य तथ्यमा आधारित आवाज उठाएको र आफूले कुनै व्यक्ति विशेषलाई लक्षित गरी गाली नगरेको स्पष्ट पार्दै अदालतको फैसलाविरुद्ध उच्च अदालतमा पुनरावेदन गर्ने तयारी गरिरहेका छन्।
