ब्रिसबेन, अष्ट्रेलिया – नेपाली युवा आशिक खड्काले अष्ट्रेलियामा आयोजित ICN Natural Bodybuilding Championship 2025 मा दुई स्वर्ण पदक जित्दै अन्तर्राष्ट्रिय मञ्चमा नेपाललाई गौरवान्वित बनाएका छन्। प्रतियोगिताको फिजिक वर्गमा उत्कृष्ट प्रदर्शन गर्दै उनले दुई स्वर्ण हात पार्न सफल भएका हुन्। त्यतिमात्र होइन, ओभरअल च्याम्पियनशिपको उपाधिमा उपविजेता बन्ने सफलता समेत उनले हासिल गरे।
विभिन्न देशका प्रतिस्पर्धीहरूसँगको प्रतिस्पर्धामा खड्काको शारीरिक बनावट, सन्तुलन, पोश्चर र प्रस्तुति शैली निर्णायकहरूको मुख्य आकर्षण बन्यो। स्वदेशबाट टाढा रहँदा पनि उनले आफ्नो प्रतिबद्धता, कडा मिहिनेत र अनुशासनमार्फत नेपाललाई अन्तर्राष्ट्रिय स्तरमा चिनाउन सफल भएका छन्।
यसअघि पनि खड्का अष्ट्रेलियामा आयोजना हुने थुप्रै स्थानीय प्रतियोगिताहरूमा सहभागी भई सफलता हात पार्दै आएका थिए। तर यसपटकको विजयले उनलाई अन्तर्राष्ट्रिय स्तरमै एक स्थापित खेलाडीको रूपमा चिनाएको छ।
“यो सफलता मेरो मात्र होइन, सम्पूर्ण नेपाली समुदायको हो,” खड्काले पदक जितेपछि प्रतिक्रिया दिँदै भने, “म देशलाई अन्तर्राष्ट्रिय मञ्चमा प्रतिनिधित्व गर्न पाउँदा अत्यन्त गर्व महसुस गरिरहेको छु। आगामी दिनमा अझ कडा मिहिनेत गरेर विश्व च्याम्पियन बन्ने लक्ष्य लिएको छु।”
नेपालका युवाहरू विश्वभर विभिन्न क्षेत्रमा सफल भइहेको सन्दर्भमा खड्काको यो उपलब्धिले खेलकुद, विशेषगरी शरीर सुगठन क्षेत्रमा समेत नयाँ सम्भावनाको ढोका खोलिदिएको छ। यो सफलताले विदेशमा रहेका नेपाली युवामाझ प्रेरणा जगाउनुका साथै नेपालभित्रको फिटनेस क्षेत्रलाई पनि थप हौसला दिएको छ।
