विरेन्द्र बाग:कञ्चनपुर, जेठ ११ । सुदूरपश्चिम विश्वविद्यालय (सुप) मा गत आर्थिक वर्ष ०८०/०८१ मा १७ करोड १६ लाख २१ हजार रुपैयाँ बराबरको बेरुजु देखिएको छ। महालेखा परीक्षकको कार्यालयले राष्ट्रपतिलाई बुझाएको पछिल्लो प्रतिवेदनमा विश्वविद्यालयको आर्थिक सुशासन र पारदर्शितामाथि गम्भीर प्रश्न उठाइएको छ।
कञ्चनपुरको भीमदत्त नगरपालिकामा केन्द्रीय कार्यालय रहेको विश्वविद्यालयले विभिन्न योजनामा कागजातविना भुक्तानी गरेकाे, असुल्नुपर्ने रकम संकलन नगरेकाे, र लाखाैं रकम पेश्कीस्वरूप लिएको देखिएको छ।
महालेखाको प्रतिवेदनअनुसार ५७ लाख ५६ हजार रुपैयाँ असुल्नुपर्ने रकम छ भने १४ करोड ६८ लाख ३७ हजार रुपैयाँ नियमित बेरुजुका रूपमा सूचीकृत छ। त्यसैगरी, विश्वविद्यालयले २ करोड ४७ लाख ८४ हजार रुपैयाँ कागजातविना भुक्तानी गरेको र ७ लाख ८३ हजार रुपैयाँ पेश्कीस्वरूप लिएको उल्लेख छ।
शिक्षा जस्तो संवेदनशील क्षेत्रमा यति ठूलो आर्थिक लापरबाही देखिनुले विश्वविद्यालयको आन्तरिक प्रशासन, पारदर्शिता र जिम्मेवारीबोधमाथि गम्भीर आशंका उत्पन्न गराएको छ।
विश्वविद्यालय स्रोतले केही योजनाका कागजात हराएको, प्राविधिक त्रुटि भएको, वा कर्मचारी तथा प्राध्यापकहरूले रकम लिएर काम नगरेको जस्ता कारणले बेरुजु देखिएको हुनसक्ने संकेत गरेको छ।
