कञ्चनपुर, जेठ २८ कञ्चनपुरको बेलौरी नगरपालिका–८ स्थित कलकट्टा बजारमा सादा पोशाकमा खटिएका एक प्रहरी असईमाथि स्थानीयको समूहले हातपात गरेको घटनाको भिडियो मंगलबार सामाजिक सञ्जालमा भाइरल बनेको छ। उक्त घटना एक साताअघि अर्थात् जेठ २१ गते बिहानको हो।
इलाका प्रहरी चौकी पचुईबाट सादा पोसाकमा गस्तीमा निस्किएका असई वीर बहादुर चन्द र जवान विष्णु उपाध्याय सीमावर्ती क्षेत्रमा गस्तीमा थिए। त्यही क्रममा भारतको सीमावर्ती बजारबाट युरिया मल बोकेर साइकलमा आएका एक स्थानीय कालुराम चौधरीलाई रोकेर सोधपुछ गरिएको थियो। असई चन्दका अनुसार चौधरीले मल घरकै लागि ल्याएको बताएका थिए।
‘मैले मुख खोलेर ल्याउनु भनेको हो, पुरै बोरा किन ल्याएको भनेर सम्झाएको थिएँ,’ चन्दले भने, ‘त्यसपछि जवानले मल बोकेर मोटरसाइकलमा चौकीतर्फ लगे, म भने एक्लै परेँ।’
त्यसपछि स्थानीय व्यापारी राहुल रानाको नेतृत्वमा आएको समूहले असई चन्दमाथि हातपात गर्दै कपडा च्यातेको आरोप छ। घटनाको भिडियोमा असई चन्द भित्री वस्त्र (सेन्डो) मा रहेका देखिन्छन् भने उनीमाथि स्थानीयहरूले हातपात गरिरहेका छन्।
प्रहरीको दाबी अनुसार उक्त घटनाअघि चन्दले भारतबाट अवैध रूपमा भित्र्याइएको केही हार्डवेयर सामग्री नियन्त्रणमा लिएका थिए, जुन सामान राहुल रानाको भएको खुलेको छ। सोही रिसको कारण आक्रमण गरिएको चन्दको भनाइ छ।
घटनामा संलग्न रहेको आरोपमा मुख्य अभियुक्त राहुल रानालाई मंगलबार पक्राउ गरिएको जिल्ला प्रहरी कार्यालय कञ्चनपुरका डीएसपी सागर बोहराले जानकारी दिए। ‘अन्य व्यक्तिहरूको पहिचान भइरहेको छ,’ उनले भने, ‘भिडियोका आधारमा अनुसन्धान अघि बढाइएको छ।’
यसबीच, असई चन्दमाथि स्थानीयले दुव्र्यवहार गर्ने, पैसा असुली गर्नेजस्ता गतिविधिमा संलग्न भएको आरोप पनि लगाएका छन्। बेलौरी–८ का वडाध्यक्ष विश्राम रानाले भने, ‘उहाँ (असई चन्द) ले स्थानीयलाई जथाभावी दु:ख दिने गरेको भन्ने गुनासो सुन्न पाइन्छ।’
घटनाबारे थप अनुसन्धान भइरहेको प्रहरीले जनाएको छ।
