विरेन्द्र बाग: जेठ २९ , जन्मकैद सजाय पाएका अपताव आलमजस्ता कुख्यात हत्यारालाई रिहा गर्न भूमिका खेलेको आरोप लगाउँदै कम्युनिस्ट युवा संगठन नेपालले उच्च अदालतका न्यायाधीश खुसराम थारुविरुद्ध ‘जनकारबाही’ गरेको दाबी गरेको छ।
संगठनका अनुसार, देशभर ‘जनकारबाही अभियान’ सुरु गरिएको छ र न्यायमा हस्तक्षेप तथा जनविरोधी फैसला गर्नेहरूमाथि प्रतिरोधको कार्यक्रम सञ्चालन भइरहेका छन्।
बिहीबार सामाजिक सञ्जालमा सार्वजनिक एक छोटो भिडियोमा कालो मुसो दलेका एक व्यक्तिलाई देखाइएको छ, जसलाई संगठनले न्यायाधीश थारु भएको दाबी गरेको छ। सो भिडियोलाई लिएर विभिन्न कोणबाट बहस भइरहेको छ।
कम्युनिस्ट युवा संगठन नेपालले आरोप लगाएको छ कि थारुजस्ता न्यायाधीशहरूका कारण अपताव आलमजस्ता अपराधीक पृष्ठभूमिका व्यक्ति सजायबाट उन्मुक्ति पाउँदै आएका छन्। संगठनले यस्तो निर्णयलाई जनभावनाविरुद्ध भएको भन्दै न्यायालयमा रहेका ‘जनविरोधी’ व्यक्तित्वविरुद्ध अभियान जारी राख्ने चेतावनी दिएको छ।
