बझाङ जिल्लाको मस्टा गाउँपालिका–१ रनाडास्थित माइतिबन निम्न माध्यमिक विद्यालयका अंग्रेजी शिक्षक धुर्ब बहादुर रोकायामाथि आइतबार राति धारिलो हतियार प्रहार भएको छ।
अज्ञात व्यक्तिहरूको खुकुरी प्रहारबाट रोकायाको दायाँ कानको भागमा गम्भीर चोट लागेको छ। प्रारम्भिक उपचारका लागि जिल्ला अस्पताल बझाङ लगिएको भए पनि अवस्था जटिल भएपछि उनलाई थप उपचारका लागि धनगढी रिफर गरिएको परिवारले जनाएको छ। रोकायाको घर खप्तडछान्ना–३ सिप्टिकोटमा पर्छ।
प्रहरी नायब उपरीक्षक खगेन्द्र धमलाले शिक्षक अत्यधिक मदिरा सेवनपछि आफैं लडेको हुन सक्ने प्रारम्भिक अनुमान रहेको बताएका छन्। तर पीडित परिवारले सामान्य लडाइँ वा लडाइँपछिको घटनाबाट यति ठूलो चोट नहुने भन्दै निष्पक्ष छानबिनको माग गरेका छन्।
घाइते रोकायाले भने घटनाबारे बयान दिँदै, दुई–तीन जनाको समूहमा आएका अज्ञात व्यक्तिहरूले आफूलाई दुई हजार रुपैयाँ माग्दा दिन नमानेपछि धारिलो हतियार प्रहार गरी फरार भएको बताएका छन्।
हालसालै चैनपुर क्षेत्रमा लागुऔषध दुरुपयोग र मदिराजन्य समस्या बढ्दै गएको भन्दै स्थानीयले यस किसिमका घटनामा संगठित समूहको संलग्नता हुन सक्ने आशंका व्यक्त गरेका छन्।
