कन्चनपुर वेदकोट नगरपालिका–१० स्थित महाकाली सिचाँई आयोजनाको नहरमा हाम फालेका एक युवक मंगलबारदेखि बेपत्ता भएका छन्।
वेदकोट–१० बस्ने २० वर्षीय बलभद्र रानाले दिउँसो बल्मा नदी नजिकैको सिचाँई नहरको साईपनबाट हाम फालेको जिल्ला प्रहरी कार्यालय कञ्चनपुरले जनाएको छ।
प्रहरी प्रवक्ता सागर बोहराका अनुसार मानसिक समस्याबाट पीडित राना परिवारको निगरानीमै रहेका थिए। उनले परिवारलाई छलेर नहरमा हाम फालेको प्रारम्भिक अनुसन्धानमा खुलेको बोहराले जानकारी दिए।
घटनापछि प्रहरी नायब उपरीक्षक (डिएसपी) बोहराको कमाण्डमा १२ जनाको टोली खटिएर खोजी भइरहेको छ। त्यस्तै, सुदूरपश्चिम प्रदेश प्रहरी कार्यालय अन्तर्गत विपद् व्यवस्थापन गुल्म, महेन्द्रनगर कञ्चनपुरबाट प्रहरी नायब निरीक्षक ललितसिंह बिष्टको नेतृत्वमा थप ६ जनाको टोली परिचालन भएको प्रहरीले जनाएको छ।
हाल शुक्लाफाँटा राष्ट्रिय निकुञ्ज क्षेत्रअन्तर्गत बेलडाँडीतर्फको नहर क्षेत्रमा रानाको खोजी कार्य जारी छ।
