सरकारले नेपालमा दर्ता नगरेका सामाजिक सञ्जाल बन्द गर्ने निर्णय गरेको छ । यस क्रममा फेसबुक, ट्विटर (एक्स), युट्युबलगायत २६ वटा सामाजिक सञ्जाल आज (बिहीबार) देखि नै बन्द गर्न दूरसञ्चार प्राधिकरणलाई पत्राचार गरिएको सञ्चार तथा सूचना प्रविधि मन्त्रालयले जनाएको छ ।
सञ्चार मन्त्रालयमा बिहीबार बसेको बैठकले मन्त्रिपरिषद्को अघिल्लो निर्णय र सर्वोच्च अदालतको परमादेश कार्यान्वयन गर्न सो कदम चालिएको हो । मन्त्रालयका स्रोतका अनुसार, दर्ता प्रक्रियामा अघि बढेमा ती सामाजिक सञ्जाल क्रमशः खोलिनेछन् ।
यसअघि सर्वोच्च अदालतले अनुमति नलिएका सामाजिक सञ्जाल तथा ओभर द टप (ओटीटी) एप्समार्फत विज्ञापनसहित सामग्री प्रसारण गर्न नपाउने आदेश दिएको थियो । आवश्यक कानुन निर्माण गरी नियमन गर्न सरकारलाई परमादेशसमेत जारी गरिएको हो ।
न्यायाधीशद्वय टेकप्रसाद ढुंगाना र शान्ति सिंह थापाको संयुक्त इजलासले बुधबार आदेश जारी गरेको थियो । अदालतले नेपालभित्र प्रसारण हुने विदेशी डिजिटल सामग्रीका लागि सम्बन्धित संस्थाले अनिवार्य रूपमा अनुमति लिनुपर्ने व्यवस्था कार्यान्वयन गर्न निर्देशन दिएको छ ।
रिट निवेदनमा नेपाल सरकार सञ्चार तथा सूचना प्रविधि मन्त्रालय, विज्ञापन बोर्ड र नेपाल दूरसञ्चार प्राधिकरणलाई विपक्षी बनाइएको थियो ।
