कञ्चनपुर । नेपाल कम्युनिस्ट पार्टी (बहुमत) कञ्चनपुरले महाकाली प्रादेशिक अस्पतालमा देखिएका विभिन्न अनियमितता, सेवा प्रवाहमा कमजोरी र प्रशासनिक अव्यवस्थाको विषयलाई लिएर अस्पताल प्रशासनलाई ज्ञापनपत्र बुझाएको छ।
पार्टीले अस्पतालमा बिरामीको उपचारदेखि औषधि सेवा, आपतकालीन कक्ष, अनकलबल सेवा, स्वास्थ्य सामग्री, लैब सेवा तथा कर्मचारी व्यवस्थापनमै गम्भीर समस्या देखिएको भन्दै तत्काल सुधारको माग गरेको छ। पार्टीले १२ बुँदे मागसमेत राख्दै समस्याको समाधान सात दिनभित्र पूर्णरूपमा नभए कडा जनआन्दोलनमा उत्रिने चेतावनी दिएको छ।
ज्ञापनपत्रमा उल्लेख गरिएका प्रमुख मागहरूमा लामो समयदेखि बन्द रहेको अनिस्थेसिया प्लान्ट तत्काल संचालनमा ल्याउन, औषधि आपूर्ति सुनिश्चित गर्न, कर्मचारीको मनोमानी अन्त्य गर्न, EHS मार्फत अत्यावश्यक सेवा सुचारु गर्न, सेवामा लापरबाही गर्ने कर्मचारीलाई कारबाही गर्न, नियमित अभाव देखिने सामग्री–औषधिको उपलब्धता सुनिश्चित गर्न, डाक्टरको अनकलबल सेवा प्रभावकारी बनाउने लगायतका बुँदाहरू छन्।
पार्टीका नेता डम्बर बिष्टद्वारा हस्ताक्षरित सो ज्ञापनपत्रमा अस्पतालमा उत्पन्न समस्या नागरिकको जीवनसँग प्रत्यक्ष सम्बन्धित भएकाले सुधारमा ढिलाइ नगर्न अस्पताल प्रशासनलाई आग्रह गरिएको छ।
