विरेन्द्र बाग: पौष ८,कञ्चनपुर , सामाजिक सेवा, साहित्य र सिद्धान्तमा आधारित राजनीतिक यात्राबाट उदाएकी चाँदनी ऐर ले आगामी निर्वाचनलाई लक्षित गर्दै आफ्नो राजनीतिक सक्रियता तीव्र बनाएकी छन्। सुदूरपश्चिम प्रदेशबाट संघीय समानुपातिकतर्फ उम्मेदवारी दिँदै उनले महिला, सामाजिक न्याय, सुशासन र आम नागरिकका मुद्दालाई सदनसम्म पुर्याउने स्पष्ट प्रतिबद्धता व्यक्त गरेकी छन्।
कञ्चनपुरको भीमदत्त नगरपालिका–२, महेन्द्रनगरमा जन्मेकी ऐरको राजनीतिक यात्रा सहज थिएन। सानै उमेरमा बुवाको निधनपछि जीवनका कठोर यथार्थसँग जुध्दै हुर्किएकी उनले साहित्यलाई चेतनाको माध्यम बनाइन्। कविता र गजल लेखनमार्फत सामाजिक यथार्थ उजागर गर्दै वि.सं. २०६७ फागुनमा “अधुरो सपना” कृति प्रकाशन गरेकी थिइन्।
साहित्यमा सीमित नरही उनी प्रत्यक्ष सामाजिक सेवामा होमिइन्। स्वयंसेवकका रूपमा करिब पाँच वर्ष सरसफाइ अभियानदेखि भ्रष्टाचार न्यूनीकरण अभियानसम्म सक्रिय रहिन्। बाढीपीडित, गरिब तथा विपन्न समुदायका लागि न्यानो लुगा, खाद्यान्न, शैक्षिक सामग्री तथा आर्थिक सहयोग जुटाउँदै देशका विभिन्न भू–भागमा निरन्तर सेवा गर्दै आइन्।
उनी Transformative Society of Nepal की संस्थापकसमेत हुन्। उक्त संस्थामार्फत उनले महिला अलपत्र उद्धार, बालअधिकार संरक्षण, सामाजिक न्याय र मानवीय सेवामा करिब ७–८ वर्ष सक्रिय भूमिका निर्वाह गरिन्। सामाजिक सेवाको क्रममा नै दिगो परिवर्तनका लागि नीति र शासन प्रणालीमै इमानदार हस्तक्षेप आवश्यक रहेको निष्कर्षमा पुगेको उनी बताउँछिन्।
यही बुझाइका आधारमा ऐर राष्ट्रिय स्वतन्त्र पार्टी सँग आबद्ध भइन्। पार्टीको सुदूरपश्चिम प्रदेशको पहिलो भेलादेखि नै संगठन विस्तार र जनसम्पर्कमा सक्रिय रहँदै आएकी उनले वि.सं. २०७९ को निर्वाचनमा संघीय समानुपातिक उम्मेदवारका रूपमा सहभागिता जनाएकी थिइन्। यद्यपि सांसद बन्ने अवसर नपाए पनि उनको राजनीतिक प्रतिबद्धता कमजोर नभएको उनी बताउँछिन्।
“अब सेवा मात्र पर्याप्त छैन, नीति नै परिवर्तन हुनुपर्छ,” ऐरले भनिन्, “महिला, सीमान्तकृत समुदाय र आम नागरिकका मुद्दा सडकदेखि सदनसम्म पुर्याउन म प्रतिबद्ध छु।”
हाल उनी सुदूरपश्चिमबाट निडर, साहसी र वैचारिक महिलाको प्रतिनिधित्व गर्दै चुनावी अभियानमा सक्रिय छिन्। इमानदारी, साहस र निरन्तरताले राजनीति शुद्ध बनाउन सकिने उनको विश्वास छ। ऐरले भविष्यमा आफ्ना संघर्ष, अनुभव र यात्रालाई पुस्तकका रूपमा उतारेर नयाँ पुस्तालाई प्रेरणा दिने लक्ष्यसमेत लिएकी छन्।
चाँदनी ऐर आज आफूलाई पदको आकांक्षी होइन, परिवर्तनको जिम्मेवारी बोकेको राजनीतिक प्रतिनिधिका रूपमा प्रस्तुत गरिरहेकी छन्।
