विरेन्द्र बाग: फागुन २१ गते हुने प्रतिनिधिसभा सदस्य निर्वाचनका लागि कैलाली–१ बाट उम्मेदवारी दिएका नागरिक उन्मुक्ति पार्टीका नेता रेशम चौधरीको उम्मेदवारी खारेज हुने भएको छ।
प्रतिनिधिसभा सदस्य निर्वाचन ऐन, २०७४ अनुसार ‘अयोग्य’ ठहरिने अवस्था आएपछि चौधरीको उम्मेदवारी खारेज हुने निश्चित देखिएको हो। मंगलबार चौधरीले उम्मेदवारी दर्ता गरेपछि बुधबार निर्वाचन अधिकृतको कार्यालयमा उनीविरुद्ध उजुरी दर्ता भएको थियो।
निर्वाचन ऐनको दफा १३ अनुसार जन्मकैदको सजाय पाएका व्यक्ति प्रतिनिधिसभा सदस्यको उम्मेदवार बन्न अयोग्य हुने व्यवस्था छ। सोही कानुनी प्रावधानका आधारमा निर्वाचन अधिकृतको कार्यालयले उजुरीमाथि छानबिन गरिरहेको छ। छानबिनपछि आयोगले बिहीबार साँझसम्म अन्तिम निर्णय दिने तयारी गरेको छ।
चौधरी २०७२ असोजमा टिकापुरमा भएको घटनामा आठ जना प्रहरी र एक नाबालकको हत्या अभियोगमा दोषी ठहर भई जन्मकैदको सजाय पाएका व्यक्ति हुन्। कैलाली जिल्ला अदालतको फैसलालाई उच्च अदालत दिपायल र सर्वोच्च अदालतले समेत सदर गरिसकेको छ। सर्वोच्च अदालतका न्यायाधीश आनन्दमोहन भट्टराई र नहकुल सुवेदीको संयुक्त इजलासले २०८० जेठ २ गते जन्मकैदको फैसला सदर गरेको थियो।
कानुनी रूपमा अयोग्य ठहर भएपछि रेशम चौधरीको उम्मेदवारी खारेज हुने अवस्था बनेको हो।
