विरेन्द्र बाग: नेकपा एमालेका युवा नेता ऐन महर लाई एमाले संसदीय दलको प्रमुख सचेतकको जिम्मेवारी प्रदान गरिएको छ। महर बझाङ जिल्लाबाट निर्वाचित सांसद हुन् भने उनी अनेरास्ववियुका पूर्व केन्द्रीय अध्यक्षसमेत हुन्।
प्रमुख सचेतकको जिम्मेवारी पाएपछि महरले खुशी व्यक्त गर्दै पूर्ण निष्ठा र इमान्दारिताका साथ आफ्नो जिम्मेवारी निर्वाह गर्ने बताएका छन्। उनले संसदीय दलका कामकारबाहीलाई प्रभावकारी बनाउँदै नेपाली जनता, लोकतन्त्र, संविधान र राष्ट्रियताको पक्षमा दृढ रहने प्रतिबद्धता जनाएका छन्।
महरले नेकपा एमालेलाई जनताको भरोसायोग्य पार्टीका रूपमा स्थापित गर्दै राष्ट्रको निर्णायक शक्ति बनाउन निरन्तर सक्रिय रहने उल्लेख गरेका छन्। साथै, उनले बझाङबासी आमाबुवा, दिदीबहिनी तथा दाजुभाइ, पार्टीका नेता–कार्यकर्ता र शुभेच्छुकहरूप्रति विश्वास व्यक्त गरेका छन्।
त्यस्तै, आफूलाई उक्त जिम्मेवारी प्रदान गर्ने पार्टी अध्यक्ष केपी शर्मा ओली, संसदीय दलका नेता रामबहादुर थापा लगायत सम्पूर्ण नेतृत्व तथा एमाले संसदीय दलका माननीय सदस्यहरूप्रति उनले हार्दिक आभार तथा धन्यवाद व्यक्त गरेका छन्।
