विरेन्द्र बाग:काठमाडौं, जेठ ७ — करिब डेढ महिनादेखि रिक्त रहेको नेपाल राष्ट्र बैंकको गभर्नर पदमा मंगलबार डा. विश्वनाथ पौडेल नियुक्त भएका छन्। मन्त्रिपरिषद्को निर्णयपछि अर्थमन्त्री विष्णुप्रसाद पौडेल नेतृत्वको सिफारिस समितिबाट सिफारिस भएका तीनमध्ये पहिलो प्राथमिकतामा रहेका डा. पौडेल गभर्नर बनेका हुन्।
पूर्वगभर्नर महाप्रसाद अधिकारीको कार्यकाल चैत २४ गते सकिएपछि निलम तिम्सिनाले कार्यवाहक गभर्नरको भूमिका निर्वाह गर्दै आएकी थिइन्।
डा. पौडेलको नियुक्ति प्रधानमन्त्री केपी शर्मा ओली र कांग्रेस सभापति शेरबहादुर देउवाबीचको सहमतिअनुसार भएको हो। नियुक्ति विरुद्ध सर्वोच्चमा परेको रिट दरपिठ भएपछि उनको नियुक्ति प्रक्रिया सहज बनेको हो।
डा. पौडेलको परिचय
ख्यातिप्राप्त अर्थविद् डा. पौडेलले अमेरिकाको युनिभर्सिटी अफ क्यालिफोर्निया, बर्कलेबाट पीएचडी गरेका हुन्। उनले विश्व बैंक, अन्तर्राष्ट्रिय श्रम संगठन, मिलेनियम च्यालेन्ज कर्पोरेशनलगायत संस्थामा कार्य गरिसकेका छन्।
केही समय राष्ट्रिय योजना आयोगका उपाध्यक्ष रहेका उनले पछिल्लो समय काठमाडौं विश्वविद्यालयमा प्राध्यापन गर्दै आएका थिए। नेपाल उद्योग परिसंघको थिंकट्यांक प्रमुख आर्थिक सल्लाहकार, नेपाल इकोनोमिक्स ओलम्पियाडका अध्यक्षजस्ता भूमिकामा पनि उनी सक्रिय थिए।
