नेकपा एमालेका सांसद ऐन महर ले विद्यार्थी आन्दोलनलाई कमजोर पार्ने वा प्रतिबन्ध लगाउने सरकारको कुनै पनि प्रयास सफल हुन नदिने बताएका छन्। आइतवार काठमाडौंमा आयोजित एक कार्यक्रममा बोल्दै उनले विद्यार्थी आन्दोलनलाई लोकतन्त्रको “पहरेदार” को संज्ञा दिँदै विद्यार्थी संगठन खारेजीको बहसलाई ‘बेतुका’ टिप्पणी गरेका हुन्।
सांसद महरले सरकारले अघि सारेको शासकीय सुधार प्रस्तावभित्र विद्यार्थी संगठन खारेज गर्ने आशय लुकेको दाबी गर्दै त्यसप्रति गम्भीर आपत्ति जनाए। उनले यस्तो प्रयास लोकतान्त्रिक मूल्य मान्यताविपरीत भएको र वर्तमान सरकारप्रति आलोचना गर्दै यसलाई अलोकतान्त्रिक, अराष्ट्रिय र आयातीत चरित्रको भएको आरोप लगाए। “यो सरकारलाई राष्ट्रियता र स्वाधीनताप्रति कुनै माया छैन,”
महरले विद्यार्थी आन्दोलनलाई सक्रिय बनाउन आग्रह गर्दै आवश्यकता परे आफू सांसद पदको जिम्मेवारीभन्दा माथि उठेर पनि आन्दोलनमा सहभागी हुन तयार रहेको बताए। “तपाईंहरू सडकमा आउनुस्, हामी सबै मोर्चाबाट साथ दिन्छौं,” उनले भने।
गणतन्त्र स्थापनामा विद्यार्थीहरूको ऐतिहासिक भूमिकाको स्मरण गराउँदै उनले अहिलेको व्यवस्थामा विद्यार्थी आन्दोलनलाई कमजोर बनाउने प्रयास स्वीकार्य नहुने बताए।
साथै, उनले संविधानको धारा ३१ मा उल्लेखित शिक्षा सम्बन्धी मौलिक हक कार्यान्वयनलाई आन्दोलनको प्रमुख एजेण्डा बनाउन विद्यार्थीलाई सुझाव दिए।
विद्यार्थी आन्दोलन सुस्ताएकोप्रति चिन्ता व्यक्त गर्दै महरले नेतृत्वलाई आत्मसमीक्षा गर्न आग्रह गरे। साथै, बदलिँदो सन्दर्भ अनुसार विद्यार्थी संगठनहरूले आफूलाई अद्यावधिक गर्दै लैजानुपर्नेमा जोड दिँदै यसको अस्तित्वमाथि धावा बोल्ने प्रयासलाई कडाइका साथ प्रतिवाद गरिने चेतावनी समेत दिनु भएको छ।
