कञ्चनपुर – बेदकोट नगरपालिका–९ का वडाध्यक्ष जनकसिंह विष्टको निधन भएको छ। बुधबार दिउँसो बेदकोट ताल क्षेत्र नजिक बेहोस अवस्थामा फेला परेका विष्टको उपचारको क्रममा मृत्यु भएको हो।
विष्टलाई तत्काल उपचारका लागि महाकाली अस्पताल लगिएको थियो। अस्पताल स्रोतका अनुसार बुधबार साँझै उपचारका क्रममा उनको निधन भएको हो। घटनाको विषयमा प्रहरीले अनुसन्धान सुरु गरेको छ। कञ्चनपुरका प्रहरी प्रमुख एसपी चक्रराज जोशीका अनुसार वडाध्यक्ष विष्टको मृत्युको कारण खुलाउनका लागि अनुसन्धान अगाडि बढाइएको छ।
निधन हुनु अघिको दिनमात्रै विष्टले सामाजिक सञ्जाल फेसबुकमा “हाँसोभित्रको पीडा” शीर्षकमा भावुक स्टाटस लेखेका थिए। बुधबार बिहान सामाजिक सुरक्षा भत्ता वितरणको कार्यक्रम सकेर उनी मोटरसाइकलमा कामका लागि निस्किएका थिए। जानुअघि उनले वडासदस्य पार्वती विष्टलाई केही जिम्मेवारीसमेत सुम्पेका थिए।
नेपाली सेनाबाट सेवानिवृत्त भएका जनकसिंह विष्ट २०७४ सालको स्थानीय तह निर्वाचनमा वडासदस्यमा निर्वाचित भएका थिए भने २०७९ सालमा वडाध्यक्ष पदमा विजयी भएका थिए। जनप्रतिनिधिका रूपमा सक्रिय भूमिका निभाउँदै आएका विष्टको अकालमै मृत्युकोे खबरले बेदकोटमा शोकको छायाँ छाएको छ।
