प्युठानको जंगलमा भएको एक दर्दनाक घटनाले पुनः अवैध शिकार र हतियार प्रयोगको गम्भीरता उजागर गरेको छ। गौमुखी गाउँपालिका–४ सुँङगुरखालस्थित चुपाल सामुदायिक वनमा जंगली जनावर ठानेर हानिएको गोली लाग्दा १९ वर्षीय सुशिल परियारको ज्यान गएको छ भने उनीसँगै रहेकी १८ वर्षीया किशोरी घाइते भएकी छन्।
चैत २९ गते भएको उक्त घटनामा गोली लागेर गम्भीर घाइते भएका दुवैलाई तत्काल उद्धार गरी जिल्ला अस्पताल हुँदै बुटवलस्थित लुम्बिनी सिटी हस्पिटल पुर्याइएको थियो। उपचारकै क्रममा चैत ३० गते परियारको मृत्यु भएको हो भने घाइते किशोरीको अवस्था अहिले खतरा मुक्त रहेको प्रहरीले जनाएको छ।
प्रहरीका अनुसार २७ वर्षीय वीरेन्द्र केसीसहित चार जना अवैध रूपमा शिकार खेल्न जंगल पुगेका थिए। टाढैबाट ‘बँदेल’ देखेको ठानेर चलाइएको गोली निर्दोष किशोरमाथि लाग्न पुगेको प्रारम्भिक अनुसन्धानबाट खुलेको छ।
घटनापछि केसीसहित चारै जनालाई प्रहरीले नियन्त्रणमा लिएको छ भने उनीहरूले लुकाएर राखेका दुई थान भरुवा बन्दुक समेत बरामद गरिएको छ। अवैध हतियार राख्ने र चोरी शिकारीमा संलग्न रहेको अभियोगमा उनीहरूमाथि ज्यान मुद्दा र हातहतियारसम्बन्धी मुद्दा चलाइने तयारी गरिएको प्रहरीले जनाएको छ।
यो घटनाले ग्रामीण क्षेत्रमा बढ्दो अवैध शिकार, हतियारको दुरुपयोग र सुरक्षाको कमजोरीबारे गम्भीर प्रश्न उठाएको छ। निर्दोष नागरिकको ज्यान जाने गरी हुने यस्ता लापरवाहीमाथि कडा कारबाही र निगरानी आवश्यक रहेको स्थानीयले माग गरेका छन्।
